نايضة وإحنا اللي خاصنا نوضوها …
بقلــم : هاجــر القــاسمــي
قالو فيلم “نايضة” ديال سعيد الناصري تحيّد من اليوتيوب فظروف غامضة ولكن راه نايضة عندنا فبلادنا من زمان! واش عاد غاتنوض يا السي سعيد ولا نوضوها حنا ؟
راه اللي خاصو ينوض هو إحنا حيت طولنا بزاف فالنعاس واللي طلع الفوق كيكمل ياكل فينا بلا ما يشبع، وحنا باقيين ساكتين…شحال باقي خاصنا باش نفيقو؟
راه ولادنا كيضيعو والدينا كيتهلكو، وحنا كنزيدو نصبرو واش الصبر غا يبني لينا المدارس لي تهدمو؟ ولا غا يرجّع الحقوق لي تسرقات؟ راه السكات ولا المرض الحقيقي اللي كيقتلنا، والسياسيين غير تيزيدو يضحكو علينا، اللي حكمونا بقوانين لهضر يمشي ياكل العدس .. لعبو بينا بحال الدمى بناو الحبسات لينا، وقسّمو ثروة البلاد قسمو كلشي خلاو لينا قلة الشي .
الصباح كيف الليل، الحياة كيف الموت، وحتى شي حاجة ما كتشعل الضو فهاذ الظلام …. وزيادة ليكاينة فهاد البلاد غير الزيادة فالمعيشة، فالقهرة، فالكذوب، فاللعب على ظهورنا …كلشي كيدّعي المعقول، ولكن المعقول غبر مع اللي شبعو وخلاونا نأكلو الهم.
الله يعفو علينا… الله يعفو علينا من هاذ النعاس اللي فاقم القهر، ومن هاذ الذل اللي رضينا بيه، ومن هاذ الصمت اللي كيدفنّا حيين…الله يعفو علينا من الحكايات الكاذبة، ومن “نايضة” اللي كيبقاو غير شعارات، وحنا اللي باقيين فالحضيض…
راه الوقت نايض علينا، وحنا باقي ما نوضناش.
