لقجع: غاز البوتان ما غاديش يزيّد… ولكن المشكل الحقيقي هو كيفاش نوصلو الدعم لمستحقيه

بقلـــم:هنــــد أكجيـــل

قال فوزي لقجع الوزير المنتدب المكلف بالميزانية ف مجلس النواب يوم الإثنين 13يناير 2025 أن الزيادة فثمن غاز البوتان متطرحاتش على طاولة الحكومة ولكين كيركز على أن الحكومة والبرلمان مطالبين انهم القاو الحل الأمثل باش اوصلو الدعم للفئة الفقيرة لي اصلا متخصص من أجلها هاد الدعم.

لقجع صرح بأن الحكومة كتخصص أكثر من 15 مليار درهم كل عام لدعم غاز البوتان، ولكن المفاجأة هي أن 20% من الناس المساكين ما كياخدوش إلا 14% من هاد الدعم، بينما 20% من الأغنياء كياخدو 27%! يعني الفقراء باقي متأخرين، والأغنياء عندهم السبق!

الوزير قال أن المشكل الحقيقي هو “كيفاش نوصلو الدعم لمستحقيه”، بحال إلى هاد الدعم كيلعبو بيه بحال كرة القدم والفقراء كيتفرجو!

وزاد لقجع بأن الدعم المباشر عن طريق تحويلات مالية هو الحل الأمثل، حيت الناس المساكين هما اللي محتاجين هاد الدعم.

في الأخير كيبان أن الحكومة كتحاول تنظم الأمور، ولكن الفقراء باقي كيتسناو فالدور… واش أحسن حاجة يديروها هو يكون عندهم صبر!؟