المغرب ماشي أرض بلا بواب ولا حيط قصير وها الجواب على جس النبض الخايب بخصوص ترحيل الفلسطنيين لصحراء المغربية.
بــقـلـم : هــاجــر القــاســـمـي
واش بصح شي حد فالعالم يقدر يصدق هاد الخرافة اللي خرجات على أن المغرب يمكن يرضى يستقبل الفلسطينيين اللي غادي يتم ترحيلهم من غزة؟ شكون هاد المعتوه اللي خرج بهاد الهضرة؟ كيفاش حتى تخيل شي حد أن المغاربة غادي يبقاو ساكتين على شي كاريثة بحال هادي؟ راه المغرب بلاد عندها جذور فالتاريخ وعندها مواقف واضحة وماشي لعبة فإيد شي حد باش يجي يجرب جس النبض ديالها بهاد النوع ديال الهضرة اللي ماشي غير مستفز، ولكن حتى خطيرة!
المغرب ديما كان فاتح بيبانو ليهود العالم وعندنا يهود مغاربة عايشين معانا قرون وكيجيونا يهود من كل بلاصة وحتى السياح الإسرائيليين كيشوفو المغرب كثر من مجرد بلاد سياحية كيشوفوه أرض الأمان الروحي ديالهم دابا تصور شي مليون ونص ديال الفلسطينيين اللي تفرقات عليهم الديار وتهدمت عائلاتهم وجاو مضطرين للمغرب، شنو غادي يكون؟ شكون اللي فكر فالنار اللي غادي تشتعل وسط هاد الوضع؟
المغاربة كيقولوها بصوت واحد: إحنا مع فلسطين وضد الظلم وضد المجازر ولكن تضامننا كان ديما سلمي وهادي هي النقطة اللي ما بغيتوش تفهموها حيت السلام اللي كنهضرو عليه غادي يتنسف إيلا تقرر فرض واقع جديد علينا إيلا بغيتونا ندخلو فمعمعة صراعات الشرق الأوسط على أرضنا راه المغرب غادي يخرج من هاد الحكاية كاملة.
احنا طبعنا مع إسرائيل فإطار اتفاق واضح: حل الدولتين ومغربية الصحراء بلا نقاش وماشي شي لعبة شد لي نقطع ليك… إيلا كان شي حد غادي يرجع فوعودو فالمغرب ما عندوش مشكلة يرجع حتى هو فقراراتو العلاقات ممكن تتقطع والسفارة تسد ومكتب الاتصال الإسرائيلي يتقفل وتهزو داك الاعتراف بالصحراء وتخليوه عندكم حيت المغرب باقي فصحراؤه والصحراء فمغربها وما عندنا حتى مشكل نكملو قرن آخر فهاد النزاع إحنا ما زربانينش على والو.
لذلك الرسالة واضحة: المغرب ماشي دولة مستضعفة وماشي باب بلا بواب وماشي أرض خاوية باش تجيبو ليها شعب مرحل من أرضو بالإكراه واللي كيبغي يلعب بالنار راه غادي يحرق راسو بيها قبل ما تحرق شي حد آخر….. شوية ديال التعقل وباركة متنشرو الفتنة حيت الفتنة أشد من القتل … باركة من الهضرة الخاوية … عندنا مشاكيل كبر من نشر هاد الإشاعة باش تشغلوووا الرأي العام …. متلعبوش من وراء الستار … عندنا ما يكفيما من المشاكيل الاجتماعية والاقتصادية و السياسية … لخاص تلقى ليها حلول حيت المواطن المغرب تيعيش إحتقان وفأي لحظة ممكن نشوفوا خريف عربي …. لهدا بلا متجسووو نبض المغاربة وخليكم غير مشاكلنا الداخلية عندنا مايكفينا بلا فتنة.
