“صرخة مواطن لحكومة المونديال غلاء الأسعار وصل للسماء والشعب جاع!”

بــقـلـم : هــاجــر القــاســـمـي

في الوقت اللي كيعاني فيه الشعب المغربي من غلاء الأسعار المواطنين لقاو راسهم فمأزق كبير، دجاج الأبيض اللي كان متوفر في المائدة ديالنا وصل ثمنه لـ 25 درهم للكيلو،
ودجاج الكروازي اللي فيه غير العظام ولى هو الحل الوحيد اللي قادرين نشريوه بثمن 20 درهم، الحوت اللي كان من أهم مصادر البروتين وصل هو الآخر لـ 25 درهم حيت السردين هو حوت الفقراء لمازال كيعيش عليه بزاف ديال الناس حتى هو مابقيناش نقدرو عليه أما اللحم راه ولا صعيب علينا حيث ثمنه وصل لـ 120 درهم للكيلو و البيض وصل 2 دراهم المطيشة 12 درهم و واللوبيا 20 درهم.

هاد الأسعار كلها كترفع الضغط على المواطن اللي بقى كيتساءل: شنو ناكل؟ شنو بغيتونا ناكلو؟ راه الشعب جاع، وهادشي فاق لقياس! كلشي ولا غالي، والمواطن فحيرة كبيرة شي ناس كيقول ليك: “الدجاج غالي و شاري تيليفون بـ 2000 درهم!” وكيبقاو يبررو الوضعية وكيدافعو على الحكوم، ولكن الحق ديالنا في الماكلة ضاع فهاد البلاد.

هاد المساج موجه للأخنوش: شنو بغيتونا ناكلو؟ واش الحجر؟ واش الحكومة مقدراتش توفر الماكلة على الأقل للشعب؟ فين هي المسؤولية؟ شكون سبق: الماكلة و ولا المونديال … واش المواطن المغربي ولا نظرة الاخرين لينا …. زعما راه نظمنا المونديال …. وانعيشو ثورة كروية…. راه بغينا ثورة فخفض الاسعار و ثورة فإصلاح التعليم و ثورة فإصلاح الصحة و بزاااااف…

فينكم من مشاكل المواطن المغربي وإحتياجاته …. راه خطابتطكم فالبرلمان متتهضروش على المغرب لحنا عايشين فيه وإنما تتهضروو على morocco لعايشين انتوما فيه هادشي ماشي ضحك راه بصاح الشعب جاع وتقهر وضروري تحركوووا وتلقاو حل … لانه ضغط تيولد الانفجار .