واش تطنز على المغاربة؟ الوزيرة بنعلي باغا الصحافة ترجع الثقة فالسياسة.
تحـــريـــر : هــاجــر القــاســـمـي
فاللقاء المفتوح فمؤسسة الفقيه التطواني بسلا خرجات وزيرة الانتقال الطاقي والتنمية المستدامة ليلى بنعلي بتصريح ماشي فمحلوو وماعجبش بزاف ديال الناس متتبعي الشأن السياسي بحيث حطات المسؤولية على الصحافة الوطنية فإرجاع ثقة المغاربة فالسياسة فواحد النوع ديال “الطنز العكري” على عباد الله.
الوزيرة قالت بصريح العبارة أن الصحافة خاصها تخدم باش ترجع الثقة فالسياسة والمنتخبين ولكن نسات باللي الأحزاب هي اللي خاصها تدير خدمتها وتعطي المغاربة أسباب يخليوهم يتيقو فيها ماشي تقلبها على الصحافيين اللي دورهم ينقلو الحقيقة ماشي يزوقو صورة السياسيين لي حتى واحد ما مقتانع بيهم.
لكن الرد ما تأخرش حيث الصحافية سناء الرحيمي ما ضيعاتش الفرصة وقالت ليها قدام الجميع: “واش بصراحة عندكم الثقة أن المغاربة غادي يمشيو يصوتو ف الانتخابات الجاية؟”، هاد السؤال لي خلا الوزيرة تبلع لسانها وما تعرف ما تقول.
تصريح ليلى بنعلي خلى بزاف ديال الناس يستغربو من تملص السياسين والمسؤولين من تحمل الفشل ديالهم حيث كاين اللي شاف فيه محاولة باش يحملو الصحافة فشل السياسيين وكاين اللي شاف أن هاد النوع ديال الهضرة غير هروب من المسؤولية.
واش فنظركم الصحافة هي اللي خاصها تعوض على السياسة الفاشلة؟ ولا الأحزاب هما اللي خاصهم يديرو خدمتهم بلا ما يقلبو على شماعة يعلقو عليها الفشل ديالهم؟
