بالــدارجـــــة …. راجل نجا من زلزال الحوز ولقى راسو ميت محروق وسط خيمة …. فشكون المسؤول ؟!
بقلــم : هاجــر القــاسمــي
“إذا نجوت من الزلزال فإنك لن تنجو من إهمال المسؤولين” هذا هو الواقع المرير لي عايشوه ناس دوار “اسلدة” فـ جماعة أسني بإقليم الحوز نهار الاثنين راجل فـ الستين من عمره كان الناجي الوحيد من أسرته بعد زلزال الحوز ولكن لقى راسو ميت محروق وسط خيمتو بعد ما شعلت فيها العافية.
شهود عيان قالو باللي العافية فاجأت الراجل وسط خيمتو وما قدرش يهرب حيت ما كاين لا وسائل أمان ولا تجهيزات تحميه هاد الحادثة هزت سكان الدوار وزادتهم ألم وقالو باللي هاد الفاجعة كان من الممكن يتفاداوها لو كان كاين اهتمام حقيقي من الجهات المسؤولة.
من بعد الزلزال الناس عايشين فـ خيام تفتقر لأبسط شروط العيش الكريم والمساعدات ما كاتكفيش المسؤولين وعدو بالحلول ولكن الواقع كيظهر بلي ما كاينش تحرك جدي لتحسين الوضع والمشاكل كتزاد يوم بعد يوم.
هاد الحادثة جابت معها تساؤلات كبيرة حول مدى اهتمام المسؤولين بحياة المواطنين بعد الكوارث وخصوصًا فـ المناطق المتضررة. الناس فـ الحوز باقيين كيتسناو تحرك سريع لإنقاذ حياتهم.
