أخبار بالدارجة المغربية: تضارب مصالح تلاحق منتخبين فـ جماعات كبرى.. الداخلية تتحرك وقرارات صارمة فـالطريق

تحركات جديدة وواسعة بدات كتقودها وزارة الداخلية بعدما توصل عدد من العمال فجهات الدار البيضاء-سطات ومراكش-آسفي وفاس-مكناس، من بينهم عمال جداد تعينو مؤخرا، بتعليمات مباشرة من الإدارة المركزية، باش يجمعو تقارير دقيقة على مستشارين جماعيين متورطين فشبهات تضارب المصالح وخروقات قانونية خطيرة.

وحسب مصادر مطلعة لعلاش تيفي هاد التقارير كتهم منتخبين فمجالس جماعية معروفة اللي تورطو فممارسات مخالفة للقانون التنظيمي 113.14 المتعلق بالجماعات، وحتى الدورية D1854 ديال وزارة الداخلية، اللي كتمنع أي تضارب بين المصالح الشخصية ومهام التسيير الجماعي و التقارير وصلات فعلاً لمسؤولين ترابيين وكشفت على خروقات خطيرة فعدد من الملفات، وكتوجد الجهات المعنية حاليا لإشعار هاد المنتخبين بالمخالفات اللي ارتكبوها.

وحسب نفس المعطيات غادي يتم اتخاذ قرارات إدارية وقضائية فحقهم كل واحد حسب حجم التورط ديالو، وداك الشي وفق المساطر القانونية المعمول بها فإشارة واضحة أن الوزارة ما بقاتش غادي تسكت على أي تجاوز فالتدبير الجماعي خصوصاً مع ارتفاع الأصوات اللي كتطالب بالحكامة والشفافية وربط المسؤولية بالمحاسبة.

هاد التحركات كتعكس عزم الداخلية على تنظيف المجالس من الممارسات المشبوهة خصوصا فالجهات الكبرى اللي كتشهد صراعات ومصالح متشابكة بين عدد من المنتخبين فانتظار ما ستُسفر عنه التحقيقات فالأيام الجاية.