ها القصة الحقيقية لطوموبيل الأمن اللي بانت شاعلة فيها العافية فمواقع التواصل الاجتماعي وقالوا بسباب الاحتجاجات… بلاغ
نفت المديرية العامة للأمن الوطني، بشكل قاطع، صحة الأخبار اللي ترافقت مع صورة منشورة فمواقع التواصل الاجتماعي، زوال الثلاثاء 30 شتنبر 2025، واللي كيبان فيها طوموبيل ديال البوليس شاعلة فيها العافية، مع تعليق كاذب كيزعم أن هاد الشي وقع فالدار البيضاء أثناء احتجاجات.
وأوضحت المديرية، فبيان حقيقة، أن الأبحاث اللي تدار من بعد ما ترصّدات التدوينة، بينات أن الصورة ما عندها حتى علاقة بالأحداث اللي عرفاتها كازا، بل كترجع لواقعة قديمة مسجلة فالـ 12 شتنبر 2025 بمدينة المرسى ضواحي العيون، ملي شعلات العافية فسيارة الأمن أثناء ما كانت خاضعة لإصلاح عند ميكانيكي.
وأضاف المصدر الأمني أن الأبحاث فداك الوقت قادت لتوقيف قاصر عندو 17 عام، متورط فإضرام النار بشكل متعمد فالمركبة، حيث تخضع للاحتفاظ تحت المراقبة الشرطية بأمر من النيابة العامة المختصة، قبل ما يتقدم للعدالة من بعد استكمال البحث.
وختم البيان بالتأكيد أن هاد الصورة المتداولة ما عندها حتى علاقة بالدار البيضاء، وأن التحريات ما زال مستمرة تحت إشراف النيابة العامة من أجل تحديد الجهة اللي روجات الخبر الزائف.
