الليالي الحمراء فمراكش خليجيين ومغربيات فضائح كتوسخ سمعة البلاد . فينكم المسؤولين ؟!
بقلــم : هاجــر القــاسمــي
مراكش مدينة الأضواء والجمال رجعات مرة أخرى وسط الجدل بسباب ما بات يُعرف بـ”الليالي الحمراء”، اللي كيجمعو فيها مواطنين خليجيين ببعض المغربيات فأنشطة خارجة على القانون والأخلاق آخر حلقة فهاد السلسلة كانت نهار السبت اللي فات ملي عناصر الدرك الملكي داهمو جوج فيلات بمنطقة الشريفية وتم ضبط سبعة خليجيين ومعاهم ثمانية مغربيات فحالة تلبس بممارسة الدعارة مع العثور على كميات كبيرة ديال الخمور والمخدرات.
هاد الواقعة ماشي غير خرق للقانون ولكن كتمس سمعة المغرب والمغربيات بشكل عام، حيث ولا الإعلام الدولي كيربط اسم البلاد بهاد الفضائح اللي كتسيء لصورة المرأة المغربية اللي كتعتبر رمز للقوة، الكرامة، والقيم، المشكل أن بعض التصرفات الفردية كتعطي الفرصة للناس باش يعممّو أحكام ظالمة على المغربيات، وكيتناساو أن الأغلبية الساحقة منهم شريفات وكيقدمّو صورة إيجابية داخل وخارج الوطن.
اللي كيزيد يعقد الأمور هو أن هاد الأحداث ماشي أول مرة كيتسجلو فمراكش اللي معروفة بجذب سياح من كل أنحاء العالم ولكن واش نقدر نقولو أن السياحة خاصها تكون على حساب القيم ديالنا وسمعة بنات البلاد؟ أكيد لا.
خاص المسؤولين يتحركو بشكل صارم باش يوقفو هاد الظواهر أول خطوة هي تنظيم القطاع السياحي ومراقبة العقارات المخصصة للكراء، بالإضافة لتحسيس المجتمع بالمسؤولية الجماعية فالحفاظ على صورة البلاد المغرب ماشي غير وجهة سياحية بل هو أرض الحضارة والقيم، وسمعة المغربيات خاصها تبقى فوق كل اعتبار.
