بقلــم : هاجــر القــاسمــي
المغاربة ساخطين بزاف هاد الأيام على الحالة اللي وصلات ليها البلاد خصوصاً مع ارتفاع الأسعار والمعيشة اللي ولات صعيبة على بزاف ديال الأسر المغربية ، حكومة عزيز أخنوش اللي كان الشعب حاط أمل كبير عليها باش تبدل الوضع ولات اليوم محور انتقادات واسعة سواء فالسوشيال ميديا ولا فالشارع.
الناس كيشكيو من الغلا اللي وصل لكلشي: الماكلة، الكراء، وحتى الخدمات الأساسية بحال الصحة والتعليم بزاف ديال العائلات ولاو مضطرين يتنازلو على أشياء ضرورية باش غير يدبرو حياتهم اليومية، الحكومة واعدة بزاف ديال الإصلاحات ولكن الواقع كيبان عكس داكشي حيث ما كاينش شي تغيير كبير فالميدان اللي يقدر المواطن يلمسو فحياتو اليومية.
السياسيين حسب كلام الناس كيبانو مهتمين غير بمصالحهم الشخصية والحزبية بلا ما يعيروا اهتمام للمعاناة ديال المواطن، الوعود الانتخابية اللي قالو عليها بحال خلق فرص الشغل وتحسين الوضع الاجتماعي باينة اليوم بحال الشعارات الخاوية.
المغاربة خصوصاً الشباب فقدو الثقة فالسياسة والسياسيين حيث كيشوفو بلي ما كاين لا شفافية ولا محاسبة فالتسيير ديال الشأن العام والنتيجة كاين واحد الإحساس بالإحباط وسط الشعب وكثرت الأسئلة واش التغيير اللي كيتسناو ممكن يوقع ولا بقى غير حلم بعيد؟
