رمضان على الأبواب.. والحكومة كتطمن والمغاربة غارقين فالغلاء…. إلى أين ؟!
بقلــم : هاجــر القــاسمــي
طمأن مصطفى بايتاس الناطق الرسمي باسم الحكومة المغاربة بأن وضعية تموين الأسواق خلال رمضان غتكون “جيدة” مؤكداً أن الاجتماعات اللي دارت على مستوى الأقاليم كتشير أن المواد الاستهلاكية غتكون متوفرة فندوة صحفية بعد المجلس الحكومي، قال بايتاس أن الحكومة غتبقى “معبأة” باش تضمن كلشي للمغاربة فرمضان.
ولكن هاد التصريحات كتجي وسط واقع مختلف تماماً حيث الأسعار كتزيد كل نهار والمواد الأساسية بحال الزيت و السكر و الحليب وحتى اللحوم ولات فوق طاقة المواطن البسيط المغاربة لي شبعوا وعود فرمضانات سابقة كيتسناو أفعال حقيقية ماشي كلام فضفاض اللي ما كيأثرش فحياتهم اليومية.
الحكومة كتقول أن الأسواق غتكون عامرة ولكن واش هاد المواد غتبقى فمتناول الجميع؟ بزاف ديال الأسر المغربية كتعيش قلق كبير حيتاش المصاريف كتعصر جيوبهم وسط ارتفاع الأسعار اللي ما كيبانش عندو حل قريب حيث الناس ولات كتشوف هاد النوع ديال التصريحات مجرد حبر على ورق بلا أثر فحياتهم.
فرمضان اللي المفروض يكون شهر البركة والتكافل كيبقى بالنسبة لكثير من العائلات المغربية معركة يومية باش يدبروا مصاريفهم وسط أزمات اقتصادية لكتشوه فرحة الشهر الفضيل.
