291 برلماني غابو على جلسة التصويت على قانون الإضراب.. واش دارو الإضراب حتى هوما؟
بــقـلـم : هــاجــر القــاســـمـي
في جلسة التصويت على قانون الإضراب بمجلس النواب البارح تغيب 291 نائب وبرلمانية وخلاو 84 برلماني يصوتو بالموافقة و20 برلماني يعارضو بلا ما يكون حتى امتناع عن التصويت هاد الغياب الكبير أثار استغراب المتابعين للشأن السياسي خصوصا أن القانون المصوّت عليه عندو أهمية كبيرة عند المواطن المغربي حيث كيشكل أول قانون من هاد النوع اللي كيتصادق عليه منذ الاستقلال.
عدد من المراقبين اعتبرو أن هاد الغياب الكبير كيعكس عدم اهتمام النواب بصورة المؤسسة التشريعية قدام الرأي العام وكيطرح تساؤلات حول الأسباب الحقيقية اللي خلات أغلبية الأعضاء يتغيبوا على جلسة مصيرية بحال هادي حيث الغياب تجاوز الثلثين وجا تزامنا مع إعلان النقابات عن إضراب عام احتجاجا على هاد القانون الشي اللي خلا بزاف ديال الناس يتساؤلو: “واش البرلمانيين دارو الإضراب حتى هوما؟
البعض شاف أن هاد الغياب ربما كان مقصود وكيعبر على محاولة بعض النواب باش ما يتحملوش مسؤولية التصويت على القانون ويفضلو يبان عليهم أنهم ما شاركوش فيه ولكن الحقيقة أن حضورهم كان ممكن يخلق نقاش جدي وربما يغير بنود القانون أو حتى يسقطه ويخلي المجال مفتوح لتوافقات جديدة.
جدل الغيابات داخل البرلمان ماشي جديد ولكن هاد الواقعة زادت كبرت النقاش حول دور لجنة الأخلاقيات ومكتب المجلس في محاسبة البرلمانيين اللي كيتغيبوا بلا مبرر فوالوقت لتتخاد فيه قرارات مصيرية… فهل غياب البرلمانيين كان تهرب من المسؤولية ولا مجرد استهتار بالعمل التشريعي؟
