6000 درهم للبرلماني وقطعو 500 درهم على المساكين… حكومة أخنوش كتزيد تعمق الهوة بين الشعب والمسؤولين…حكومة الكفاءات نعم أسيدي…
بــقـلـم : هــاجــر القــاســـمـي
واش بصح هاد البلاد كتحارب الفقر ولا كتحارب الفقراء؟ الحكومة ديال أخنوش دارتها زوينة هاد المرة زادت البرلمانيين 6000 درهم فوق لفلوس اللي كيشدو وفنفس الوقت قطعات 500 درهم على عائلة فقيرة كانت مستافدة من الدعم .
هاد القرار خلا المغاربة كيغليو بالغضب والتدمر وكيطرحو سؤال كبير: علاش المسؤولين ديما كيشوفو راسهم قبل الشعب؟كيفاش ناس كيشدو الملايين فالصالير والتعويضات والمزايا زيدهم كاع 6000 درهم وناس مساكن عايشين غير بدعم بسيط تحيدو ليهم؟
واش هادي هي الدولة الاجتماعية اللي وعدونا بيها؟ ولا غير هضرة على الخاوي؟ الشعب ولى عايش تحت الضغط ديال الغلاء، المعيشة كتحرق، والبطالة كتعصر والدولة عوض ما تلقى حلول حقيقية كتعطي الفلوس للّي عندو وتقطعها على اللي ما عندوش.
اللي كيزيد يحرق الدم هو كيفاش كيبررو هاد المهزلة كيقولو خاص البرلماني يكون عندو ظروف مزيانة باش يخدم مزيان ولكن واش خدمو مزيان فالأول؟ واش راهم كيعطيو القيمة للمواطن اللي صوت عليهم؟ واش كاين شي برلماني كيسول على الناس اللي كيموتو بالجوع ولا اللي كيغرقو فالبحر باش يهربو من هاد الوضع؟
ولا غير تايبانو ملي كيبغيو يتزادو فالصالير؟حكومة أخنوش ولات كتمثل المصالح ديال الأغنياء والمترفين أما الفقراء والمساكين فهما غير أرقام فالإحصائيات ما بقاش غير مشكل ديال توزيع الفلوس ولكن مشكل ديال انعدام العدل والإنصاف و الناس عاقت وفاقت وما بقاتش كاتصدق ليهم الهضرة ديال “الإصلاح” و”الدولة الاجتماعية”… المغرب ديال بصح خاصو حكومة كتفكر فالشعب ماشي غير فجيوبها.
