أكيد كنفرحو بالانتصار أولاً، وكنفرحو أكثر بالتأهل للدور الموالي ثانياً، بعدما حقق المنتخب المغربي فوزاً مهماً على منتخب اسكتلندا، لكن فرحة النتيجة ما خاصهاش تغطّي على بعض الملاحظات التقنية اللي بانت خلال المباراة، خصوصاً أن العناصر الوطنية ضيّعات فرصاً بالجملة كانت كافية لحسم المواجهة بنتيجة أكبر وبشكل مريح.
ورغم الفوز، المنتخب المغربي عاش لحظات صعيبة وكاد يتلقى أهدافاً مفاجئة من المنتخب الاسكتلندي، لولا أن الحظ واليقظة كانا حاضرين في بعض اللقطات. وكما كيقولو المغاربة: “سلمات الجرة”، ولكن خاصنا نعترفو أن المنتخب مازال كيعاني من غياب مهاجم صريح قادر يترجم الفرص لأهداف.
كما أن بعض اللاعبين اللي كيبقاو فالاحتياط وما كيدخلوش إلا فالدقائق الأخيرة، بان فعدة مناسبات أنهم قادرين يعطيو إضافة أكبر من بعض العناصر اللي كتحتافظ بالكرة بزاف وكتحاول تدير كلشي بوحدها، من المراوغة للتسجيل وصناعة اللعب.
الناخب الوطني وهبي أكيد واعي بأن المرحلة المقبلة غادي تكون أصعب، وخصو يعاود النظر فبعض الاختيارات والتركيبة البشرية، ماشي غير باش نربحو هايتي، ولكن لأن الدور الثاني غادي يجيب مواجهات قوية أمام منتخبات ما كتسامحش مع الأخطاء وما كتضيّعش أنصاف الفرص، فبالأحرى إلا كانت الفرص كاملة وجاهزة للتسجيل. هنيئاً لنا بالفوز والتأهل، لكن الجماهير المغربية مازالت كتسنى أداءً أكثر إقناعاً ونتائج تطمّن القلب، باش يختفي ذلك الخوف اللي كيتملكنا مع كل هجمة ديال الخصوم. ديما مغرب
