محمود هرواك.
مراكش شاعلة فيها العافية الانتخابية، ومنين حطو الملفات عند السلطات، والسخونية طالعة!! حزب الأصالة والمعاصرة دخل للدوائر الأثقل فالخريطة بـ”المدافع الثقيلة” وضرب الطاولة، باغي يوري للمنافسين أن مراكش ماشي ديال اللعب.
فاطمة الزهراء المنصوري حطات ثقلها كامل فـ”المدينة”، ونزلت كـ”حجرة ثقيلة” حركت المياه اللي كانت راكدة. المنصوري داخلة بوزنها السياسي باش تقلب الطاولة وتفرض قواعد جديدة فـ”اللعبة”. وفنفس الوقت، الدكتور طارق حنيش حط ملفو مرشح ديال”المنارة” – الدائرة اللي معروفة بـ”عش الدوارة” باش يكون رأس حربة معول على التغلغل الميداني وشعبيته فالمعمعة.
ولكن الضرب الصحيح ماشي غير فالقيادة، التنزيل كان مصحوب بالشباب. المنصوري وحنيش ما مشاوش لـولاية الجهة بوحدهم؛ كان وراهم إنزال شبابي حامي، بقيادة الدكتور طارق حيدار (المنسق الجهوي لشبيبة البام) ومعاه عبد الصمد مليوش (عضو الأقطاب الجهوية الذكية). هاد المرافقة الشبابية بينات بلي البام كيعول على “الموتور الحامي” ديال الشبيبة باش يحرث الميدان ويتواصل زنقة زنقة مع المواطنات والمواطنين.
اليوم فالبهجة، الهدرة الخاوية والتوافقات ديال الكواليس تسالات!! الأحزاب الأخرى كتقلب كيفاش تسد الثقوب، والبام مراهن على تجربة الكبار ودينامية الشباب باش يسد اللعب على الخصوم اللي كيتربصو بيه. الانتخابات فالمحيط المراكشي ماشي غير حملة وصافي، بل ملحمة حقيقية.. والسلاح كاين فالخطاب والتعبئة، والكلمة الأخيرة غادي يقولها غير “الصندوق”!
