والله لا فهمتي شي لعبة .. حبس رئيس تنسيقية ضحايا زلزال الحوز، واش اللي كيطالب بالحق كيتعاقب؟
فقرار غريب بزاف، حكمات المحكمة الابتدائية فمراكش على سعيد أيت مهدي، رئيس تنسيقية ضحايا زلزال الحوز، بـ3 شهور نافذة وغرامة 500 درهم، وزادت عليه تعويض 10,000 درهم للطرف المدني، هادشي كامل لأنه كان كيحاول يهضر بصوت الضحايا اللي تهرسات حياتهم فواحد من أكبر الكوارث الطبيعية فالمغرب،
بلاما نسولو علاش هاد الحكم خرج فهاد السرعة القياسية، واش داكشي ديال الزلزال خلا الناس بلا مأوى وسعيد أيت مهدي لي خرج كيهضر على حقهم هو اللي تّشد، واش فعلاً اللي كيهضر على المعقول كيولي مجرم،
سعيد أيت مهدي كان معروف بالنضال ديالو والنية ديالو باش يوقف مع الضحايا، ولكن ملي خرج كيهضر على الإهمال والتهميش، لقا راسو متهم، وكأن اللي كيطالب بالحق خاصو يخلص الثمن، وراه الناس اللي كانوا كيعولوا على التنسيقية باش ترجع ليهم حقوقهم، ولات عندهم خوف جديد، كيفاش غادي يدافعو على حقهم بلا ما يتشد شي واحد آخر،
المثير فالملف هو الغموض لي داير بيه، واش كان شي ضغوطات، ولا القضية عندها علاقة بتصفية الحسابات، الناس بقات حايرة، وحتى اللي كيهضر على القضاء والنزاهة، بدا كيسول على هاد الحكم واش هو فعلاً على أسس قانونية ولا غير رسالة مسجلة لكل من سولت ليه راسو يهضر،
ضحايا الزلزال كيتسناو من هاد الحكم يكون آخر نقطة فهاد الملف الغامض، راه اللي وقع ليهم كافي، وخصنا نكونو معاهم ماشي ضدهم، ولكن مع الأسف، من اللي كتشوف بحال هاد القرارات، كيبان باللي راه مازال قدامنا بزاف باش نفهمو شنو هي العدالة الحقيقية، وشنو يعني تكون عندك الجرأة باش تقول الحق.
