علاش تيفي / محمود هرواك
علمات “علاش تيفي” من مصادرها الخاصة وعالية الاطلاع، بلي الحسناء الميريكانية ونجلة البيت الأبيض إيفانكا ترامب، حطّات الرحال فواحد من أندر وأفخم الأماكن السياحية بالمغرب، وتحديدا فـ”مارغة” التابعة لجماعة أسني بإقليم الحوز، بعدما هربات من ضغوط السياسة والصداع ديال واشنطن باش تعيش تجربة “الهاي ليفيل” وسط السكينة والطبيعة العذراء ديال جبال الأطلس.
ووفق المعطيات الحصرية اللي حصلات عليها “علاش تيفي”، فإيفانكا ما جاتش تدير السياحة العادية ديال “البكباك”، بل تفصل ليها برنامج سياحي “سوبر لوكس” على المقاس؛ نزلات فالأول فواحد من أفخم القصور الخاصة بالحي الشتوي فمراكش وسط كتمان شديد، من بعد خالطات الناس فمجموعة من المناطق بمراكش ومشات لمنتجع ليلي قبل ما تتحرك فـ”كونفوا” أمني مجهّز بكاطكاطات مضللة، متجهة لارتفاعات أسني، وبالضبط لمنطقة “مارغة” اللي كتعتبر جنة مخفية كيقصدوها غير كبار أغنياء ومشاهير العالم، حيث تقضي عطلتها فإقامة جبلية فاخرة محاطة بحراسة كتقطر هيبة تجمع بين الأجهزة الأمنية المغربية العالية الكفاءة والمرافقة الخاصة اللي جابتها معاها من الميريكان.
الجديد اللي جابت “علاش تيفي” بوحدها من دون الجرائد هو بلي بنت ترامب طالقاها للعيشة وبغات تعيش حياة “بساطة فاخرة” فـ”مارغة”؛ صباحا غدير “هايكينغ” وجولات استكشافية على رجليها بين الدواوير الخلابة وشجر الجوز واللوز، وغتفطر بالإفطار البلدي الأصيل من أملو والعسل الحر وأتاي بنعناع الأطلس، وفي العشية غترجع للرفاهية المطلقة مع جلسات المساج والسبا البلدي بزيوت أركان والأعشاب الطبية، حيث عبرات للمقربين منها على انبهارها الكبير بالسحر السري ديال المنطقة وتأثيره العجيب فإبعاد بنادم على ضجيج العالم والسياسة والاقتصاد.
هاد الزيارة اللي كتنفرد بنشر تفاصيلها “علاش تيفي”، كتقيد فخانة العشق المتبادل بين عائلة ترامب والمغرب، كزيارة ثالثة معلنة لإيفانكا للمملكة بعد زياراتها السابقة لي كانوا فيهم المعلنة والغير المعلنة، واختيارها لـ”مارغة” وأسني بالذات كيعتبروه الملاحظين ضربة معلم للترويج السياحي، وغادي يزيد يفرقع الأسهم ديال السياحة الجبلية الفاخرة فجهة مراكش-آسفي وبالذات فإقليم الحوز، ويبيّن للعالم بلي المغرب ماشي غير مدن عتيقة وشواطئ، بل فيه مخابئ جبلية ملكية كيعشقوها المليارديرات والشخصيات الأكثر تأثيرا فالعالم.
