تصريحات بنسعيد تشعل مواقع التواصل الاجتماعي واش هي تهديد أم زلة لسان؟
بقلــم : هاجــر القــاسمــي
تصريح مثير للجدل خرج بيه وزير الشباب والثقافة والتواصل المهدي بنسعيد قال فيه: “حنا ولاد الناس ولي قلب علينا يلقانا” خلا المغاربة يسولو بزاف واش كاينة أزمة وسط التحالف الحكومي؟ ولا غير كلام داز بلا حساب؟هاد الجملة لي فيها نوع من التهديد تخلات البعض يتسائل واش فعلاً الحكومة غادية فانسجام ولا كاينين مشاكل داخلية كتغلي وحتى المغاربة العاديين على مواقع التواصل بداو كيقولو “واش حنا الحيط القصير؟ لي ناض يهضر ولا ينتقد الحكومة يولي مهدد؟”
تصريح بنسعيد جا فواحد الوقت حساس لي المغرب كيعاني من تحديات اقتصادية واجتماعية كبيرة والناس كيتسناو من الحكومة حلول حقيقية ماشي مشاكل بين أعضائها… المغاربة اليوم كيتسناو يوضح الوزير واش كلامو كان موجه لشركاء التحالف ولا مجرد هضرة خرجات بلا قصد خصوصاً وأن الشعب كيدفع ثمن أي تصدع فالعمل الحكومي.
دابا الكرة فملعب الحكومة باش ترد على هاد الجدل والمغاربة كيبقاو يشوفو واش الصراعات غادية تعرقل الخدمة لي خاصها تدار ولا خطابات لحملات إنتخابية قبل أوانها زعما راحنا مدرنا والو فالاغلبيية الحكومية وغادي نديرو انجازات وحنا على رأس الحكومة المقبلة … علامن تيضحكوا هدو .
